Wala pa sang may narekord nga kinagamo ukon paglapas sa protocol ang mga police personnel nga deployed sa Jaro Catholic Cemetery.
Sa interview sang Bombo Radyo kay Police Senior Master Sergeant Reniel Quirante, Team Leader sa area, iya ginpahayag nga madamo na sang mga nagapadulong sa nasambit nga patyo agud timprano pa nga makabisita sa ila nga himata.
Suno kay Quirante, padayon ang ila pagpahanumdom sa mga tawo nga hugot nga ginadumilian ang pagdala sang bisan ano nga sahi sang armas kag matalum nga bagay, kalakip na ang pagdala sang makahulubog nga ilimnon.
Fully vaccinated lang ang makasulod sa patyo kag wala ginapasugtan ang mga naga-edad 18 anyos panubo.
Dugang pa sang pulis, bisan siraduhon ang nasambit nga patyo umpisa Oktubre 29 tubtob Nobyembre 2, hugot sa gihapon ang ila pagbantay sa lugar agud masiguro nga wala sang may makalusot agud magsulod sa patyo.
