Hugot nga ginabantayan sang mga pulis ang pila ka mga parking area sa syudad sang Iloilo kasunod sang asud-asud na nga kinawatay sang gatong pinaagi sa paggisi sang fuel pipe sang mga salakyan.
Sa interview sang Bombo Radyo kay Iloilo City Police Office (ICPO) Director Police Colonel Uldarico Garbanzos, iya ginpahayag nga masami sa mga ginatarget sa serye sang pagpangawat sang gatong amo ang salakyan sang medical frontliners.
Bangud sini, gindeploy na ang pila ka mga police personnel sa parking area sang pila ka mga ospital sa syudad kalakip na sa parking area sang dalagko nga mga establisiemento kag mall.
Suno kay Garbanzos, las 6:00 sang kasisidmon tubtob las 12:00 sang kaagahon ang deployment sang mga pulis, oras kun sa diin masami nagakatabo ang modus sang mga nagapangawat sang gatong.
Pahayag sang pulis, wala untat man ang ila imbestigasyon agud matumod ang mga indibidwal ukon grupo sa likod sang amo nga modus.
