ILOILO CITY- Gintawag nga abusador ni Iloilo City Mayor Jerry Treñas si Land Transportation Office- 6 Assistant Regional Director Engr. Arturo Apolinar kasunod sang ginaalegar pagwaslik-poder sang LTO Official.
Ini may kaangtanan sa reklamo sang mga katapo sang Public Safety and Transportation Management Office (PSTMO) nga apat ka beses na nga nagpamalibad si Apolinar nga magpundo kag magpadakop bangud sa traffic violation.
Sa interview sang Bombo Radyo kay Mayor Treñas, iya ginpahayag nga wala nagakabagay para sa mga maalam nga pumuluyo sang syudad nga bastuson lang sang kaangay ni Apolinar.
Ginhangkat naman sang alkalde si LTO-6 Director Eric Tabaldo nga maghimo sang disciplinary action batok sa ARD bangud kun pabay-an lang ini, mas maayo pa nga islan nalang ang director sang LTO Region 6.
Ginpalab-ot naman sang alkalde ang reklamo batok kay Apolinar sa pila ka opisyal sang gobyerno nga ginalakipan nanday Sec. Art Tugade, Sec. Salvador Medialdea, Sec. Karlo Nograles, Sec.Ed Año kag Sec. Harry Roque.
Nagpaandam man ang alkalde nga handa siya nga pasakaan sang kaso sa Ombudsman si Apolinar.
