Yara na sa state of decomposition ang nasapwan nga bangkay nga nakasuksok sang itom nga t-shirt kag puti nga shorts sa sulod sang isa ka tinted nga sports utility vehicle (SUV) nga ginapahayag pila na ka-adlaw nga naka-park sa kilid sang dalanon sa Barangay Inangayan, Sta. Barbara, Iloilo.
Sa interview sang Bombo Radyo kay Punong Barangay Ricardo Bayog, iya ginpahayag nga kaagahon sang Sabado, Oktubre 23, sang una nga nakit-an sang mga residente ang amo nga salakyan nga naga-hazard sa kilid sang dalanon.
Ginabanta las 7:00 sang gab-i sang amo man nga adlaw sang nakit-an sang pila ka mga residente ang wala makilal-an nga isa ka babaye kag lalaki nga naggwa sa amo nga salakyan.
Suno kay Bayog, gindumdom sang mga nakakita nga mag-asawa ang duha.
Sang nagligad nga Dominggo, Oktubre 24, ginabanta las 3:00 sang kaagahon sang nalabayan sang isa ka residente sang Barangay Inangayan ang isa ka babaye kag lalaki nga nagabaisay sa atubang sang amo nga salakyan.
Pahayag sang opisyal, ginabanta tatlo na ka-adlaw ang nagligad, wala man sa gihapon nakahalin ang amo nga salakyan sa kilid sang dalanon gani nagkabalaka na ang pila ka residente kag gindesisyunan nila nga ipatsikyar ini sa mga barangay tanod.
Diri kag nakit-an ang lawas sang isa ka babaye nga nagasandig kag ginputos sa habol nga puti.
Gilayon nga nagresponde kag nagpadulong sa lugar ang Scene of the Crime Operatives (SOCO) kag narekober sa sulod sang salakyan ang pila ka mga ID nga nakapangalan kay Claire Diergos, puti nga t-shirt, isa ka short, isa ka pares sang underwear kag brown nga sling bag.
SIN-O ANG TAG-IYA SANG SALAKYAN?
Ginkumpirma ni former San Dionisio, Iloilo Mayor Peter Paul Lopez nga si certain ‘Claire Diergos’ ang tag-iya sang isa ka sports utility vehicle (SUV) kun sa diin nasapwan ang bangkay sang babaye nga yara na sa state of decomposition sa Barangay Inangayan, Sta. Barbara, Iloilo.
Ang pangalan nga Claire Diergos ang napagkit sa narekober nga mga ID sa sulod sang amo nga salakyan.
Sa interview sang Bombo Radyo kay Lopez, iya ginpahayag nga ginbakal ni Diergos sa iya sang nagligad nga tuig ang nasambit nga salakyan sa balor nga P850,000.
Suno kay Lopez, may duha pa ka-tuig nga nabilin antes ma-impas sang babaye ang ginbakal nga salakyan.
Pahayag sang anay alkalde, maayo nga tawo ang pagkakilala niya kay Diergos kag isa ini ka single nga iloy, may isa ka anak, nagatrabaho bilang ahente sang mga bulong kag residente sang Dagsaan, Buenavista, Guimaras apang nagapauli man sa isa ka subdivision sa Pavia, Iloilo.
”SI ‘CLAIRE DIERGOS’ ANG BANGKAY NGA NASAPWAN”
Nakapadulong sa punerarya ang himata sang babaye nga nasapwan nga wala na sang kabuhi sa sulod sang isa ka salakyan sa Barangay Inangayan, Sta. Barbara, Iloilo.
Sa interview sang Bombo Radyo kay Police Lt. Loen Cachila, Team Leader sang Regional Crime Laboratory 6, iya ginpahayag nga ang 36 anyos nga si Claire Diergos, amo man ang bangkay nga nasapwan sa nasambit nga lugar.
Ini ang santo sa kumpirmasyon sang utod mismo sang babaye.
Suno kay Cachila, sa inisyal nga pagtsikyar sa bangkay, apat ka patal nga pilas sa li-og kag duha ka defense wound sa wala kag tuo nga kamot ang na-angkon sang biktima.
Posible suno sa natungdan nga kutsilyo ang gingamit sa pagpatay kay Diergos.
Natalana naman nga ipaidalom sa autopsy examination ang bangkay sang babaye.
