Nag-isyu na sang subpoena ang National Bureau of Investigation (NBI) sa talent manager nga si Annabelle Rama may kaangtanan sa cyber libel complaint nga ginpasaka batuk sa iya sang former aide ni Senator Manny Pacquiao.
Gina-imbitahan si Annabelle nga magpadulong sa NBI sa Nobyembre 3.
Suno kay NBI regional director Atty. Emeterio Dongallo, ang katuyuan sang subpoena amo nga mahatagan sang kahigayunan si Annabelle nga mapaathag ang iya nga kaugalingon.
Nahibaluan nga sang Oktubre 22, nag-tweet ang talent manager sa wala sini ginpangalanan nga inbidwal tuhoy sa financial deals sa hampang sadto ni Pacquiao.
Gintawag naman sang anay aide sang senador nga si Jayke Joson si Annabelle nga “epal” kag “sipsip” bangud sa akusasyon batuk sa iya.
Nagapanindugan naman ang talent manager sa iya nga statements batuk kay Joson kag handa man ini nga atubangon ang ano man nga kaso nga ipasaka sa iya.
