Natumod na sang Special Investigation Team ang ruta sang salakyan sang kontrobersyal nga si Claire Diergos nga nasapwan nga bangkay na sa sulod sang iya sports utility vehicle (SUV) sang Oktubre 26, 2021 sa Barangay Inangayan, Sta. Barbara, Iloilo.
Sa interview sang Bombo Radyo kay Police Major Raymond Celoso, hepe sang Sta. Barbara Municipal Police Station, iya ginpahayag nga sandig sa kuha sang closed-circuit television (CCTV) cameras, yari ang ruta sang salakyan sang biktima antes ini ginbilin sa Barangay Inangayan:
Barangay Balabag diretso sa Jibao-an diretso sa Buyo diretso sa Tagsing diretso sa Pal-agon diretso sa Balibagan Este diretso sa Inangayan.
Ang nasambit nga mga barangay ang sakop sang banwa sang Sta. Barbara, Iloilo.
Suno kay Celoso, ”shortcut” ang gin-agyan sang driver sang salakyan kag ini ang makatilingala.
Posible suno sa pulis nga ”planado” kag may ”patalang” nga natabo.
”BLOODSTAIN SA 2 KA ULUNAN, INDI DUGO SANG TAWO”
Samtang, naggwa na ang resulta sang test nga ginpatigayon sang Regional Crime Laboratory Office 6 sa duha ka ulunan nga may mantsa sang dugo nga nakit-an sa irigasyon — ginabanta 800 ka metros ang kalayuon sa Barangay Inangayan — lugar kun sa diin naka-park ang salakyan sa diin nasapwan ang bangkay sang biktima.
Pahayag ni Celoso, indi dugo sang tawo ang na-detect kag posible dugo sang sapat.
Dugang pa sang pulis, posible nga isa man ini ka sahi sang ”patalang” sang suspek ukon mga suspek sa likod sang krimen.
Sa subong nagapadayon ang maid-id nga imbestigasyon sang mga otoridad angot sa kontrobersyal nga pagpatay kay Diergos.
