Mas nagbaskog ang pagpati sang mga pulis nga sa sulod mismo sang kwarto ni Claire Diergos sa Deca Homes Subdivision sa Pavia, Iloilo natabo ang krimen.
Sa interview sang Bombo Radyo kay Police Major Raymond Celoso, hepe sang Sta. Barbara Municipal Police Station, iya ginpahayag nga santo sa ginpatigayon nga luminol test sang Scene of the Crime Operation (SOCO) Team sa balay ni Diergos sa nasambit nga subdivision, na-detect ang madamo nga agsik sang dugo sa sulod mismo sang kwarto sang biktima.
Nahibaluan nga sa pag-perform sang luminol test, may gina-spray ang forensic investigators nga substance sa crime scene agud ma- detect ang nagtulo ukon naglapta nga dugo.
Ma-detect man sini pati ang dugo nga ginpahiran na ukon ginlimpyuhan na sang kriminal.
Sa sulod sang kwarto, na-detect ang pinahidan kag agsik sang dugo sa:
- Salog;
- Kama;
- Foam;
- Cabinet;
- Sa salog sang dressing room ukon bayuan;
- Dingding kag pwertahan sang C.R.; kag
- Pulungkuan
Sang gin-sprayhan sang mga eksperto ang palibot sang balay, diri natukiban nga may pinahidan man nga dugo sa tub sang washing machine ni Diergos kag sa iban pa nga bahin sang iya nga balay.
Pahayag sang pulis, posible nga pagkatapos sang krimen, nakapaninlo pa ang suspek ukon mga suspek kag maid-id nga ginhimos ang sulod sang kwarto sang biktima.
Sa pihak sini, nagpanawagan naman si Celoso sa mga indibidwal nga may ihibalo sa krimen nga makig-angot sa mga otoridad.
