Nagpamalibad na si Rodelyn Sumbong, kabulig sa balay ni Claire Diergos, nga maghatag sang statement sa Bombo Radyo samtang ginapadalman ang isyu kaangot sa natabo nga krimen nga ginkamatay sang iya nga amo.
Sang ginpadulungan sang Bombo News Team ang balay ni Sumbong sa Barangay Cabilauan, Barotac Nuevo, Iloilo kaina sang aga, ginpahayag sang ugangan sini nga magakuha sila sang abogado.
Sang gin-text naman sang Bombo News Team, ginpahayag ni Sumbong nga “tama kasakit” sang iya nga ulo rason nga wala siya nakaatubang sa Bombo.
Kun balikan, sandig sa una kag exclusive interview sang Bombo Radyo kay Sumbong sang Oktubre 27, ginpahayag sini nga Domingo, Oktubre 24, amo ang una niya nga adlaw bilang kabulig kun sa diin ginsugat pa siya ni Claire sa Tagbak, Jaro.
Oktubre 25, Lunes sang kaagahon, natingala nalang ini nga wala na sa balay ang iya employer tubtob nga nakit-an nalang ini sang Martes, Oktubre 26, nga wala na sang kabuhi kag puno sang pilas tuga sang pagkabuno kag naputos pa sa habol kag comforter sa sulod sang iya salakyan sa Barangay Inangayan, Sta. Barbara, Iloilo.
Apisar wala na sang statement nga ginhatag sa Bombo Radyo, ginpakigbahin sini ang exhange of text messages sa tunga nila ni Claire halin sang adlaw nga gin-hire siya tubtub sa katapusan nga mensahe nga iya na-send.
HWEBES, OKTUBRE 21
Una nga nag-text si Claire kay Sumbong kag nagsiling nga gin-refer siya ni Che. Si Che nga ginatumod amo ang nagpatigayon online agud nga makakita si Claire sang bag-o nga kabulig sa balay.
Nag-reply si Sumbong nga pwede makatawag si Claire.
BYERNES, OKTUBRE 22
Nag-text liwat si Sumbong agud ipamangkot kun san-o siya maga-umpisa sa trabaho.
Nakasugtan sang duha nga Domingo siya magaumpisa kag ginsugid man ang location nga Deca Homes sa Pavia.
Nakasugtan man ang sweldo, kag naistoryahan man nga duha lang si Claire kag ang iya nga three-year-old nga bata nga babayi sa balay.
Pagkagab-i, naistoryahan ang day off ni Sumbong.
SABADO, OKTUBRE 23
Una nga nag-text si Sumbong kun san-o siya sugaton ni Claire.
Sabat ni Claire, 2:00 pm-3:00 pm sa Tagbak Terminal.
DOMINGO, OKTUBRE 24
Una nga nag-text si Claire. “Diin ka na dampi, Miss? Pakadto na ko Tagbak.”
Nagsunod-sunod na ang istorya sang duha tubtub nga nakakit-anay sila sa Tagbak Terminal. 4:30 pm katapusan nga gin-send ang mensahe ni Sumbong sang amo nga hapon.
LUNES, OKTUBRE 25
6:42 sang aga, nag-text si Sumbong kay Claire: ‘Nang, nakulbaan ko mag-gamit sang stove. Wala pa ko nakaluto sud-an.”
6:43 sang aga: “Ginasaksak pa ni ang stove nang?
7:01 sang aga: “Na-open ko na nang, ah.”
Wala na sang reply halin kay Claire.
MARTES, OKTUBRE 26
Nag-text liwat si Sumbong.
10: 20 sa aga: “Nang, morning. Wala na di gali rice, wala naman cereals [ang baby] nang kag wala naman stock sang mga canned goods nang.”
Wala sang reply halin kay Claire.
Oktubre 26 sang hapon sang nakit-an ang bangkay ni Claire.
May closed-circuit television camera (CCTV) footage nga ginahawiran ang mga pulis kun sa diin nakit-an nga nakabiya pa 4:20 sang kaagahon sang Oktubre 25 ang salakyan ni Diergos. Indi madeterminar kun sin-o ang driver.
May separado man nga CCTV footage kun sa diin nakit-an nga naglabay man ang SUV sang biktima sa Sta. Barbara Heights area takna 5:17 sa aga sang amo man nga adlaw.
Sa irigasyon naglabay ang salakyan ni Claire.
Wala na-recover ang iya nga duha ka cellphones tubtub subong. Magapakig-angot man ang special investigation team sang PNP sa telecommunications company agud nga mareview ang call history kag transcript of messages sang biktima. ##
