ILOILO CITY- Ginkuha na sang iya pakaisa nga pulis ang timbang ni Claire Diergos— ang babaye nga nasapwan patay sa sulod sang sports utility vehicle (SUV) sa Inangayan, Sta. Barbara, Iloilo.
Ang timbang amo si Rudelyn Sumbong, may live-in partner, sang Baclayan, New Lucena, Iloilo kag temporaryo nga naga-istar sa Cabilauan, Barotac Nuevo, Iloilo.
Sa exclusive interview sang Bombo Radyo kay Jessica Ganuhay, ugangan ni Rudelyn, iya ginpahayag nga kahapon, ginkuha ang iya umagad sang iya pakaisa nga pulis sakay sang puti nga van sa Cabilauan, Barotac Nuevo, Iloilo.
Suno kay Ganuhay, ginpakamaayo nila nga ipakuha nalang si Rudelyn sa iya himata agud mahatagan ini sang proteksyon.
Ini bangud suno sa natungdan, daw kaangay nga may nagabantay sa ila balay humalin sang natabo ang krimen.
Si Rudelyn ang tatlo na ka tuig nga naga-live in sa anak ni Jessica nga si Robert Ganuhay.
