Ginpili sang pambato sang Pilipinas sa Tokyo Olympics nga si Yuka Saso ang Japanese citizenship.
Suno sa 20 anyos nga Pinay Olympian, mas ginpili niya ang Japan bangud sa nationality law sini.
Sa idalom sang Japanese nationality law, kinahanglan nga magpili ang indibidwal nga may dual citizenship kun ano ang iya mangin nationality sa tion nga mag-edad na ini sang 22.
Matandaan nga ang iloy ni Saso ang isa ka Filipina kag Japanese national naman ang iya amay.
Nangin tiglawas pa sang Pilipinas si Saso humalin sang nag-umpisa ini sa pag-intra sa mga kompetisyon sa iban nga pugsod bilang junior golfer, bilang isa ka amateur, kabahin man siya sa Asian Games sa Jakarta sang 2018 kag sa 2020 Tokyo Olympics.
Si Saso man ang nagdaog sa 2021 US Women’s Open kag ika-anom sa bilog nga kalibotan matapos ang iya paghampang sa Founders’ Cup sa New Jersey sa diin nakuha niya ang fourth place.
