Madamo sang qualified beneficiaries sa syudad sang Iloilo ang nakabaton sang cash assistance halin sa nanuhay-tuhay nga mga programa sang gobyerno kaangay sang Kabuhayan Program sang Department of Labor and Employment (DOLE), Tabang OFW sang Overseas Workers Welfare Administration (OWWA), cashless transactions sang Land Transportation Franchising and Regulatory Board (LTFRB) kag iban pa.
Ini ang kasunod sang pagpadulong sa Iloilo City nanday Labor Sec. Silvestre “Bebot” Bello III kag Department of Transportation Sec. Arthur Tugade, kun sa diin nagpanagtag ang mga ini sang bag-o nga batch sang cash assistance kag nagpanguna sa inagurasyon sang bag-o nga headquarters sang Philippine Coast Guard-Western Visayas.
Sa interview sang Bombo Radyo kay Iloilo City Lone District Representative Julienne ‘Jam Jam’ Baronda, iya ginpahayag nga dako ang pagpasalamat sang syudad sa pagpalab-ot sang bulig sang mga ahensya sang gobyerno.
Suno kay Baronda, sa ginpanagtag nga cash assistance, mapahagan-hagan man ang impact sang pandemya sa mga Ilonggo.
Magluwas diri pahayag sang mamalidha, nagpanagtag man sang 25 ka mga e-tricycle si Sec. Tugade sa pila ka mga barangay sa syudad.
Nagpasalig man si Tugade nga iga-release naman ang ayuda para sa mga public utility jeepney (PUJ) drivers sa syudad bangud pirmado na sini ang fuel subsidy.
