Sigurado nga tikang kag mapag-on nga mga ebidensya ang ginatipon kag ginatutukan sang Special Investigation Team sa kaso ni Claire Diergos.
Sa interview sang Bombo Radyo kay Iloilo Police Provincial Office (IPPO) Director Police Col. Gilbert Gorero, iya ginpahayag nga indi ordinaryo kag sa masami, sa pelikula lang makit-an ang kaso ni Claire.
Suno kay Gorero, bisan ano nga adlaw, mahimo na sila makapasaka sang kaso bangud may ginakaptan na sila nga mga pangalan kag nagasanag na ang imbestigasyon.
Apang gin-athag ni Gorero nga ”proof beyond reasonable doubt” ang sahi sang mga ebidensya nga ginatipon nila kag kun magpadaso-daso lang sila sa ila nga hulag, delikado ang mangin dalagan sang kaso.
Gin-ako sang IPPO Director nga ”challenging” ukon dako nga pagpanghangkat ang ini nga kaso para sa mga katapo sang pulis, gani luyag nila nga mahatagan ini sang husto kag sigurado nga hustisya.
