Ginhingyo ni Quezon City Representative Alfred Vargas, ang chairman sang committee on social services sa Kamara, ang Department of Trade and Industry (DTI) nga istrikto nga i-monitor ang presyo sang noche buena items subong nga holiday season.
Sa iya gin-file nga House Resolution 2348, nag-apelar man si Vargas sa mga manufacturers kag mga manugbaligya nga indi na magpataas sang presyo sang basic goods agud mapahagan-hagan ang galastuhon sang mga Filipino nga apekatdo sang COVID-19 pandemic.
Suno kay Vargas, nagakadapat nga ipatuman sang national government ang “just regulation” sa presyo sang balaklon agud mabatyagan ang ispirito sang bayanihan subong nga Paskwa.
“As we expect the increase in demand for noche buena goods and basic necessities due to the holiday season, it is imperative that prices of such commodities are regulated under the context the COVID-19 pandemic to help Filipino consumers while also protecting the rights and income of manufacturers and sellers,” pahayag ni Vargas sa iya resolution.
Sini lang nga bulan, una na ginpahayag ni Trade Secretary Ramon Lopez nga nagpasalig ang pila ka mga manufacturers sa pungsod sang ila nga commitment nga indi pagkambyuhon ang presyo sang noche buena items sa holiday season.
