Importante nga i-check gid ang label kag rekisahon sang maayo ang mga Chistmas lights antes baklon kag i-dekorar sa sulod sang balay subong nga Christmas season.
Pahanumdom ini sang Department of Trade and Industry (DTI) sa mga taga-probinsya sang Iloilo agud nga malikawan ang sunog sa holidays kag malikawan man ang anuman nga problema sa kuryente.
Suno kay DTI-Iloilo Director Felisa Judith Degala, ang mga Christmas lights nga pwede mabaligya sa merkado amo lamang ang may yara sang Product Standard (PS) mark kag Import Commodity Clearance (ICC) sticker — mga ebidensya nga ini ang safe kag may maayo nga kalidad.
Pwede man nga ma-verify sang customer kun genuine ukon indi ang PS kag ICC markings.
Pwede nga ma-download sang consumers sa ila nga Android phones ang ICC verification application halin sa Playstore kag amo ini ang magamit agud nga ma-scan ang QR code nga yara sa box sang Christmas lights.
Kun ma-scan na ang QR Code, maga-guwa ang impormasyon may kaangtanan sa lights nga naga-match sa information sa box.
Kun pekeon sang mga manugbaligya ang pagsulundan sa PS kag ICC markings ukon ibaligya ang indi certified nga Christmas lights, pwede mapasaka ang kaso nga paglapas sa Deceptive Sales Act and Product Standards Law.
