ILOILO CITY- Wala sang plano ang Iloilo Provincial Government nga magpatuman sang ‘No Booster, No Entry’ Policy sa Iloilo Provincial Capitol.
Sa interview sang Bombo Radyo kay Iloilo Governor Arthur Defensor Jr., iya ginpahayag nga nahangpan niya nga una bes, may mga empleyado sa kapitolyo nga apisar fully vaccinated na, apang wala pa nakapatublok sang booster shot bangud bag-o lang nahatagan sang second dose.
Apang suno sa gobernador, prayoridad niya nga maka-administer ang Provincial Health Office sang booster shot sa tanan nga empleyado.
Apang gin-athag niya nga sa tion nga nakabaton na ang tanan nga empleyado sang booster shot, indi man insigida nga magpatuman ang kapitolyo sang amo nga polisa kag tun-an nila ini sang maayo agud maghatag konsiderasyon sa mga pumuluyo nga naga-transact apang indi fully vaccinated ukon wala natublukan sang booster shot.
