ILOILO CITY- Makabig nga pinaka-convenient kag pinaka-pinasahi nga Bar Examination sa kasaysayan sang pasinawan ang matabo subong nga tuig.
Ini ang paglantaw sang isa ka Bombo Abogado kasunod sang desisyon sang korte suprema nga palip-uton sa duha lang ka adlaw kag buhinan ang coverage sang 2020/2021 Bar Exam sa tunga sang pagpamahog sang Omicron coronavirus variant kag epekto sang Bagyo Odette.
Sa interview sang Bombo Radyo kay Atty. Joenar Pueblo, constitutional law professor, iya ginpahayag nga bentaha ini para sa bar examinees agud indi sila matam-an sa gasto kag mapalip-ot man ang tion nga mapahilayo sila sa pamilya.
Suno kay Pueblo, bentaha man para sa bar examinees ang pag-limit sang coverage sang exam nga may apat ka sets kag nagasakop sang walo ka subjects: 1. The Law Pertaining to the State and Its Relationship With Its Citizens; 2. Criminal Law; 3. The Law Pertaining To Private Personal and Commercial Relations; kag 4. Procedure and Professional Ethics.
Pahayag sang abogado, ini nga desisyon sang Korte Suprema ang makabig nga pag-utod sang malawig nga paghulat sang mga bar examinees nga mas madugay man ang tion nga sila ang nag-review kun ipaanggid sa iban nga batches bangud sa pandemya.
Dugang ni Pueblo, kinahanglan man nga dayunon ang Bar exams agud malab-ot kag masabat ang demand para sa bag-o nga mga abogado.
Patigayunon ang Bar Exam sa Enero 23, 2022, Domingo kag Enero 25, 2022, Martes, nga una kuntani nga gin-schedule nga patigayunon sa apat ka Domingo umpisa sa Enero 16.
Matandaan nga sang 2020, nagdesisyon ang Supreme Court en banc nga ipaiway ang Bar exams bangud sa COVID-19 pandemic.
Magaserbi naman nga Bar chairperson amo si Associate Justice Marvic Leonen.
