ILOILO CITY- Gin-athag sang Iloilo Provincial Government nga indi sini pagbag-uhon ang travel protocol para sa mga byahero nagikan sa Bacolod City.
May kaangtanan ini sa nauna nga tikang sang Iloilo City Government nga pangayuan sang negative RT-PCR test result ang mga tawo nga halin sa Bacolod City matapos nga gin-require man sang Bacolod City sang negative RT-PCR test result ang mga byahero halin sa Iloilo City.
Sa interview sang Bombo Radyo kay Iloilo Provincial Administrator Atty. Dennis Ventilacion, iya ginpahayag nga bangud pareho nga napaidalom sa Alert Level 2 status ang Bacolod City kag Iloilo Province, magapabilin ang pagpatuman sang amo nga protocol.
Suno kay Ventilacion, ang mga byahero lang gikan sa gwa sang Western Visayas ang pangayuan sang negative RT-PCR test result, 72 ka oras antes ang ila byahe.
