ILOILO CITY- Patay na sang masapwan nga nagabitay sa balayan kag ginapatihan nga naghikog ang isa ka Grade 12 student sa Brgy. Avila, Buenavista, Guimaras.
Sa interview sang Bombo Radyo kay Police Captain Anton Von Winkle Lamson, hepe sang Buenavista Municipal Police Station, iya ginpahayag nga base sa ila pagpangusisa, antes nasapwan ang 18-anyos nga soltero, nagbaisay sila sang iya iloy kagab-i, Enero 16.
Ginpahayag ni Lamson nga nagbiya sa ila balay ang biktima kag nagpadulong sa ila ancestral house.
Kaina sang aga sang naabtan ini sang iya lola nga may higot na sa liog nga nagapungko sa bangko kag wala na sang kabuhi.
Suno kay Lamson, masinungguron nga klase sang tawo ang biktima matapos gintuad sang iya pamilya nga una na sadto nagtuyo nga magpanginmatay ang biktima paagi sa pag-inom sang bleach (Zonrox).
Wala na sang plano ang pamilya nga ipaidalom sa autopsy ang soltero bangud kumbinsido ang mga ini nga hungod nga pagpanginmatay ang natabo.
