ILOILO CITY- Nadakpan na paagi sa gahum sang warrant of arrest ang Top 2 Most Wanted Person sa listahan sang Iloilo City Police Office.
Ang arestado amo si John Michael Talamor, 23 anyos,residente sang North Fundidor, Molo, Iloilo City nga may kaso nga Rape kag paglapas sa Anti Child Abuse Law matapos ginhimuslan sini ang menor de edad nga manghod sang iya karelasyon.
Sa interview sang Bombo Radyo kay PMajor Shella Mae Sangrines, spokesperson sang Iloilo City Police office, iya ginpahayag nga nadakpan si Talamor sa Purok Sigay, Brgy. 2, Bacolod City kun sa diin ini nagpanago.
Suno kay Sangrines, nagatabok-tabok sa Panay kag Bacolod City si Talamor agud magpanago apang namutikan ini sa gihapon sang otoridad tubtob nga natultulan ang iya ginapanaguan kag nadakpan.
Yara na ini subong sa custodial facility sang Molo PNP nga amo ang origin sang warrant of arrest.
Wala naman sang piyansa sa iya kaso nga rape.
