Nahilway na ang isa ka lalaki sa Chicago, USA nga duha ka dekada nga na-preso bangud sa sala nga nakomiter sang iya nga kapid.
Ang lalaki amo si Kevin Duggar, 44, samtang ang kapid naman sini nga nag-ako nga siya ang nakahimo sang murder sang 2003 amo si Karl Smith.
Na-convict si Kevin sang 2005 kag na-sentensyahan sang 54 ka tuig nga pagka-preso kasunod sang natabo nga gang-related shooting nga nagresulta sa murder.
Ginapahayag nga inseparable gid ang kapid halin sang pagkabata. Bangud identical twins sanday Kevin kag Karl, nabudlayan man ang ila nga pamilya kag mangin ang ila suod nga mga abyan sa pag-identify sa ila.
Magkatuhay ang ila nga apelyido bangud nga ginpasunod kay Karl ang maiden name sang iya nga iloy. Sang naga-edad na sang 20 anyos, nag-ulu-intra ang kapid sa pagbaligya sang iligal nga droga sa Chicago.
Sunod nga natabo amo ang gang-related violence. Nagpalupok ang gunman sa isa ka uptown area sa Chicago kun sa diin isa ang patay kag isa ang pilason. Gin-aresto sang mga pulis si Kevin, apang nag-insister ini nga inosente ini sa krimen. Gin-interogar pa ni Kevin ang iya kapid nga si Karl kun may kaangtanan ini sa krimen apang gin-deny man ni Karl ang amo nga hitabo — rason nga nagpati man si Kevin.
Sang ulihi, sang 2013, nag-ako na si Karl nga siya matuod ang gunman kag indi ang iya nga utod. Ginpaagi niya ang iya nga confession sa isa ka sulat. Si Karl ang may yara naman nga daan sang 99-ka-tuig nga sentensya sang pagkapreso bangud sang lain nga kaso — pagpangawat nga nag-resulta sa kamatayon sang isa ka anum ka tuig nga bata.
Lakip sa sulat ni Karl amo ang: “First off, I’d like to say I’m sorry for all these years you’ve missed out of your daughter’s life and also for all the pain you’ve endured over the last decade or so. Look Kevin, please don’t tell Momma or Dad. Let me be the one to tell them.”
Sang 2014, ginpirmahan ni Karl ang amo nga sworn confession. Sang 2018, nagpa-guwa sang desisyon ang judge kag nagpahayag nga indi mapatihan ang confessions ni Karl. Gindingutan sini si Kevin sang bag-o nga trial. Suno sa korte, gin-ako lang ni Karl ang amo nga krimen bangud may yara naman ini nga daan sang 99-year sentence rason nga wala man sang madula sa iya kun akuon sini ang sala sang iya nga kapid. Ginpahayag sang korte nga gintinguhaan lang ni Karl nga i-save ang iya utod rason nga nag-ako ini sang amo nga krimen.
Sang 2021, gin-grant sang Court of Appeals ang new trial para kay Kevin. Sang amo nga tion, lain na ang judge.
Sang Enero 25 subong nga tuig, gin-grant ang bond kag yara na subong si Kevin sa residential transitional facility.
Wala pa gin-anunsyo sang Cook County state’s attorney’s office kun dropped na gid ang kaso.
Apang suno sa abogado ni Kevin, “pretty overwhelmed” ini nga nakaguwa sa presuhan kag nakahakos liwat sa iya nga pamilya. ##
