Wala pa sang nabaton nga official communication ang Department of Justice (DOJ) halin sa United States Federal Bureau of Investigation (FBI) agud nga ma-extradite si Pastor Apollo Quiboloy, ang self-proclaimed “appointed son of God” kag “owner of the universe” nga gin-tag nga “wanted” sa Estados Unidos.
Suno kay Justice Secretary Menardo Guevarra, samtang wala pa napakig-angot ang FBI, indi man makamato-mato ang Pilipinas ilabi na kun Filipino citizen man ang wanted person bangud kinahanglan ini nga mag-agi sa diplomatic channels.
Nahibaluan nga sa ginpaggwa nga “wanted” poster sang FBI, nakit-an ang laragway ni Quiboloy kag duha pa ka myembro sang Kingdom of Jesus Christ Church nga sanday Teresita Tolibas Dandan kag Helen Panilag.
Nagapangatubang si Quiboloy sang sampaw-sampaw nga kaso bangud sa ginapahayag partisipasyon sini sa labor trafficking scheme kun sa diin gindala niya ang pila ka mga myembro sang ila nga simbahan sa Estados Unidos gamit ang mga peke nga visa.
Ginapahayag nga ginapilit sang pastor ang mga myembro sang iya simbahan nga magpangayo sang donasyon para sa bogus nga charity, kag ginabulsa sini ang natipon nga kwarta kag ginagamit sa operasyon sang ila simbahan kag sobra-sobra nga lifestyle.
Suno kay Bombo International Correspondent Rufino “Pinoy” Gonzales direkta sa Estados Unidos, sandig sa nangin imbestigasyon sang FBI, natukiban nga ginapilit man ni Quiboloy ang iya mga personal assistants sa pagpakighilawas.
Matandaan nga Nobyembre sang nagligad nga tuig sang gin-akusaran sang United States District Court sa Santa Ana, California, si Quiboloy kag pila ka mga opisyal sang iya simbahan bangud sa pagpadalagan sang sex-trafficking operation kag pagpamahog sa mga biktima.
Apang ginpanginwala sang abogado sang pastor ang mga alegasyon batok sa iya kliyente.
