Posible nga matapos na sini nga bulan sang Marso ang ginakay-o nga drainage sa Barangay Q. Abeto, Mandurriao, Iloilo City.
Una na ginreklamo sang pila ka mga residente ang nasambit nga construction bangud napabay-an na lang ini humalin sang bulan sang Disyembre sang nagligad nga tuig matapos ginpauntat sang City Engineer’s Office ang trabaho sang matukiban nga wala sang permit ang contractor sa amo nga proyekto.
Sa interview sang Bombo Radyo kay Punong Barangay Ramon Amoroso, iya ginpahayag nga nagpasalig na ang contractor nga South Prime Construction nga ginaproseso na nila ang permit.
Suno sa opisyal, nagpasalig man ang contractor nga matapos na nila ang proyekto sa Marso.
Naghingyo man ang opisyal sa iya mga pumuluyo nga antuson lang anay ang huol bangud kun makay-o na ang drainage, dako man ang benepisyo nga mahatag sini sa ila palibot, ilabi na sa paglikaw sa baha kun magbubo ang mamunog nga pag-ulan.
