Ginbawian gid sang kabuhi ang isa ka lalaki matapos na-aksidente ang iya ginamaneho nga motorsiklo sa center island sang Barangay Tabuc Suba, Jaro Iloilo City.
Ang biktima amo si Ryan Saad, 33, kag residente sang Barangay Sta. Rosa, Mandurriao, Iloilo City.
Sa interview sang Bombo Radyo kay Police Executive Master Sergeant Richie Dequito, Traffic Investigator sang Jaro Police Station, iya ginpahayag nga papauli na kuntani si Saad sang nakabunggo ang iya ginamaneho nga motorsiklo sa isa ka poste nga nabali gid bangud sa mabaskog nga impact.
Bangud man sa impact sang pagkabunggo, nawasak gid ang helmet ni Saad kalakip na ang unahan nga bahin sang iya motorsiklo.
Patal nga pilas sa ulo ang na-angkon sang biktima nga amo ang gintunaan sang iya kamatayon.
Ginapahayag nga yara sa impluwensya sang makahulubog nga ilimnon ang lalaki sang natabo ang insidente.
