Ginkwestyon sang alkalde sang Concepcion, Iloilo ang nangin report sang isa ka international marine conservation group nga Oceana nga may nagakatabo nga illegal, unreported and unregulated (IUU) fishing sa amo nga banwa.
Una na gin-report sang Oceana nga ang blue swimming crabs ukon kasag nga halin sa Pilipinas ang accounted sa halos one-fourth sang kabug-usan nga IUU wild-caught products sa Estados Unidos sang 2019.
Sang amo nga tuig, natukiban nga naga-import ang US sang masobra P122.8 billion nga balor sang seafood paagi sa illegal fishing.
Gin-cite sang Oceana ang banwa sang Concepcion sa Northern Iloilo nga amo ang main sources sang blue swimming crabs sa Pilipinas.
Ginpahayag sang marine protection group nga ang iligal nga aktibidad sa Concepcion ang naga-contribute sa overexploitation sang blue swimming crab nga amo ang makabig pamahog sa palangabuhian kag food security sang mga Filipino nga naga-depende lang sa pagpangisda.
Sa interview sang Bombo Radyo kay Concepcion, Iloilo Mayor Dr. Raul Banias, iya ginpahayag nga indi gid siya komporme sa amo nga impormasyon kag nagapakig-angot na siya sa Oceana agud makapangayo sang paathag.
Suno alkalde, ginakabig gani sang Oceana bilang ‘best practice area’ para sa coastal resource management ang banwa sang Concepcion kag tuman man ka istrikto ang pagpatuman sang banwa sang pagsulundan angot sa fishing kag pagbaligya sang seafood.
Pahayag ni Banias, ginapasigurado man nila nga antes sila mag-import sang seafood, nakasandig ini sa Seafood Import Monitoring Program (SIMP) nga may traceability requirements para sa imports.
