ILOILO CITY- Ginpa-Bombo sang isa ka dialysis patient sa Western Visayas Medical Center ang pagsimpon sang mga COVID positive patients sa mga pasyente nga naka-recover na sa COVID-19.
Sa interview sang Bombo Radyo kay alyas Ruby, iya ginpahayag nga una siya nga nagpositibo sa COVID-19 kag sang gin-reswab, siya ang nagnegatibo.
Apang suno sa iya, matapos siya nga nagnegatibo sa COVID-19, siya ang gindala sa ward para sa recovery apang sa amo nga ward, may yara naman sang mga nagpositibo sa virus.
Suno sa tagreklamo, sang Enero 15 pa ini na-admit kag sang natapos na kuntani ang iya quarantine period, liwat na naman siya nga nalakip sa contact tracing gani nga na-extend na naman ang iya pagtinir sa ospital.
Nagpangabay ini nga kuntani, may yara gid sang area nga i-designar ang ospital para sa mga nagnegatibo na sa virus agud nga indi na sila mabutang sa risgo nga malatnan liwat ukon ilakip sa contact tracing bangud pat-ud nga dugang na naman ini nga gasto para sa pasyente.
Nagpaathag naman ang tagdumalahan sang ospital angot sa amo nga reklamo sang pasyente.
Sa interview sang Bombo Radyo kay Mr. Richard Saltin, spokesperson sang WVMC,iya ginpahayag nga kulang gid man ang hospital sang mga rooms para sa mga pasyente.
Apang suno sa iya, may yara man sang cubicle agud mangin barrier para malimit ang spread sang infection sa kada pasyente nga yara sa amo nga ward.
