ILOILO CITY- Istriktuhan gid sang Iloilo City Government ang paghatag sang permit para sa mga organizers sang campaign activities sa Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga antes ang pag-release sang permit, ila gid ipapat-ud ang commitment sang organizers nga ipatuman ang physical distancing kag ang pagsunod sa 50% nga venue capacity.
Suno sa alkalde, bangud makabig nga potential super spreader event ang mga campaign rallies, kinahanglan nga tinguhaan gid sang mga kandidato nga magsunod sa mga protocol nga gina-require sang National Inter-Agency Task Force.
Pahayag niya, magapakigsugilanon man siya sa mga kandidato ukon grupo nga magapatigayon sang campaign rallies kag hingyuon nga mangin responsable sa pagtuman sa mga protocol ilabi pa nga yara sa gihapon ang Iloilo City sa Alert level 3 status.
