ILOILO CITY- Naresolba na ang reklamo sang pila ka mga residente sa Barangay Tolarucan, Mina, Iloilo batok sa arosera ukon rice mill nga ginapanag-iyahan ni Mayor Rey Grabato.
Matandaan nga nagapanguna nga concern sang mga pumuluyo amo ang indi maagwantahan nga gilok nga tuga sang arosera.
Sa interview sang Bombo Radyo kay Atty. Arjun Calvo, Legal Officer sang Environmental Management Bureau(EMB) Region 6, iya ginpahayag nga sa ila ginpatigayon nga techincal conference nga gintambungan sang magtimbang nga grupo, ginrekomendar sang EMB sa tagdumalahan sang arosera nga sundon gid kun ano ang nasaad sa guidelines sa operasyon sang arosera.
Suno kay Calvo, ini ang nagalakip sang water spraying ukon sprinkler systems agud nga ma-trap ang gilok kag indi na maglapta sa gwa sang vicinity sang rice mill, kag ang pagbutang sang fine screen sa palibot sang arosera agud indi makagwa ang gilok.
Pahayag ni Calvo, may yara man sang gin-assign nga Pollution Control Officer (PCO) nga empleyado sang arosera agud masiguro nga ginasunod ang standard procedure.
Pahayag ni Calvo, ini nga PCO, apisar empleyado ini sang arosera ang kinahanglan nga mangin strikto sa pagbantay kag i-report sa EMB kun may violation ang arosera bangud kun mapaslawan ini nga tungdan ang iya papel kag indi magsugid sang matuod, posible ini nga makuhaan sang accreditation kag ma-blocklist.
