ILOILO CITY- Nag-file na sang counter charges ang kampo ni anay San Dioniso, Iloilo Mayor Peter Paul Lopez batok sa mga testigo sa likod sang Claire Diergos Murder Case.
Sa interview sang Bombo Radyo kay Atty. Toefisto Melliza, legal counsel sang pamilya Lopez, iya ginpahayag nga kaso nga perjury ang ila ginpasaka batok sa mga masunod nga testigo:
1.amay ni Claire
2.duha ka utod ni Claire
3.bayaw nga lalaki
4.traysikad driver
5.una nga timbang ni Claire antes ni Rudelyn Sumbong
6.PSSgt Icen Howen Beronio sang San Dionisio PNP
Suno kay Melliza, lunsay wala sang kamatuoran ang sworn affidavit sang mga testigo nga amo ang masunod:
1.alegasyon sang traysikad driver nga nakita niya sanday Peter Paul Lopez kag asawa nga si Sally Lopez sa gwa sang Montero Sport kun sa diin nasapwan ang lawas ni Diergos sa Brgy. Inangayan, Sta. Barbara
2.alegasyon sang anay timbang ni Diergos antes niya gin-hire si Rudelyn Sumbong,nga nakita niya sadto si Sally Lopez nga masakit ang pagtulok kay Claire samtang yara sila sa isa ka restaurant sa Jaro
3.alegasyon sang traysikad driver nga nakita niya ang mga suspects nga sanday Raffy Sorioso kag Gardo Ibrahim nga may ginahakwat nga mabug-at nga bagay nga naputos kag gindala sa likod sang Montero Sport.
Pahayag ni Melliza, sa bahin naman ni Rudelyn Sumbong nga timbang ni Claire, wala sang plano ang pamilya Lopez nga magpasaka sang kaso batok sa iya bangud wala pa man sang affidavit nga ginpirmahan si Sumbong.
