Mahimo nga maka ”BABE TIME” ang tanan nga couples sa mga motels, inns, kag hotels sa kasarangan nga presyo sa syudad sang Iloilo sa Valentine’s Day.
Apang sandig sa tagdumalahan sang pila ka mga nasambit nga inns kag hotels sa syudad, istriktuhan nila ang pagpasulod sang guests sa adlaw sang Valentine’s sa diin indi pag-i-akomodar ang mga indibidwal nga wala sang i-presenta nga vaccination card kag wala nagasuksok sang face mask.
Sa interview sang Bombo Radyo kay Evangeline Po, Operations Manager sang goldberry hotel sa Mapa Street, Iloilo City, iya ginpahayag nga ginapasigurado nila nga indi makompromiso ang ikaayong lawas sang tagsa ka mga customer paagi sa pagpatuman sa minimum health protocol.
Yari naman ang presyo sang mga hulot sa nasambit nga hotel:
Lite Room – P1,500
Standard – P2,000
Deluxe – P2,800
Suite – P3,800
Penthouse – P4,200
Suno naman sa tagdulamalahan sang isa ka motel sa Calaparan, Arevalo, Iloilo City, bisan tuman ka barato ang tanyag nila nga presyo sa pag-akupar sang mga hulot, istrikto man nila nga tutukan ang pagpatuman sang protocols.
Sa interview sang Bombo Radyo kay Dianalin Minerva, Motel owner sa nasambit nga lugar, good for two persons na ang P120 nga hulot nga mahimo i-akupar sa sulod sang tatlo ka oras.
P250 naman ang ila sukot sa mga maga-akupar sang isa ka hulot sa sulod sang 12 ka oras.
Suno kay Minerva, wala gid sila naga-akomodar sang mga menor de edad, amo man sa mga indi bakunado kag wala nakasuksok sang face mask agud malikawan ang pagtimbuok sang COVID-19 cases sa syudad.
Sa bahin naman sang tagdumalahan sang isa ka lodging house sa Divinagracia St, La Paz, Iloilo City, Iloilo, ginapasigurado gid nga mag-asawa ukon lehitimo nga couple ang ila gina-akomodar kun Valentine’s day.
Sa interview sang Bombo Radyo kay Joylen Antoniana, supervisor sang lodging house sa nasambit nga lugar, iya ginpahayag nga ginapa-presenta gid nila sang ID ang mga maga-check-in nga couple sa adlaw sang tagipusuon.
Sa garahe pa lang suno sa iya, ginatsikyar na sang mga gwardya ang bitbit nga mga dokumento sang mga indibidwal nga maga-check-in agud mapasiguro nga bakunado ang mga ini batok sa COVID-19 kag indi menor de edad.
