Isa ka bulan kag tunga pa lang ang naglabay sa tuig 2022 apang nagdangat na sa 314 ang na-rekord nga vehicular accidents sa probinsya sang Iloilo.
Sa sini nga numero, 80% ang naga-involve sang mga motorsiklo suno sa rekord sang Iloilo Police Provincial Office (IPPO). Covered sini ang rekord halin Enero 1 tubtub sa Pebrero 13, 2022.
17 diri ang patay.
175 naman ang nag-resulta sa damage to property, kag 124 ang nag-dangat sa physical injury.
Sa interview sang Bombo Radyo kay Police Corporal Erwin Magarzo, spokesperson sang IPPO, iya ginpahayag nga hubog ang mga nadalahig sa sini nga mga aksidente kag wala man sang suksok nga helmet.
Bilang lihok naman sang otoridad, may random checkpoints nga ginapatigayon ang mga pulis, magluwas pa sa random Commission on Elections (Comelec) checkpoint nga ginapatigayon may kaangtanan sa 2022 elections.
