ILOILO CITY- Wala nakarecord ang Task Force on Morals and Values Formation sang mga violators sang Regulation Ordinance No. 2015-447 subong nga Valentine’s day.
Ang ordinansa nagadumili sa mga accommodation establishments sa pagpasulod sang menor de edad kag ang paglapas sini ang may katumbas nga multa nga P5,000, pagkapreso sang isa ka tuig ukon possible cancellation sang business permit.
Sa interview sang Bombo Radyo kay Mr. Nestor Canong, pinuno sang task force, iya ginpahayag nga hugot gid nga ginbantayan sang mga personnel sang task force ang 19 ka mga establishments kaangay sang beach resorts, motels ukon lodging houses.
Suno kay Canong, ila man gin-istorya ang tagdumalahan kag mga staff sang establishments kag tanan ang nagatuman man sa ordinansa.
Dugang ni Canong, pamaagi ini agud maproteksyunan ang mga pamatan-on kag malikawan nga maremalaso subong nga Valentine’s day.
