ILOILO CITY- Nabaton na ni PLt. Col Jonathan Pinuela ang anom ka bulan nga suspension order nga gindagdag sang Office of the Ombdusman.
Ini may kaangtanan sa kaso nga conduct prejudicial to the best interest of the service, grave abuse of authority kag grave misconduct nga ginpasaka batok sa iya ni Jeffrey Mar Agub angot sa ginaalegar pagtaya ni Pinuela sang armas kay Agub nga tinawo ni former Congressman Ferj Biron sang 2019.
Sa interview sang Bombo Radyo kay Pinuela, iya ginpahayag nga epektibo ang suspension order sa Pebrero 16 tubtob sa Agusto 15.
Suno kay Pinuela, masakit para sa iya nga bahin nga i-suspend siya apisar ginahimo lang niya ang iya katungdanan sang amo nga tion bilang intelligence officer sa probinsya kag team leader sang Anti-Vote Buying Task Force sa 4th kag 5th districts kun sa diin
nagresponder lang ini sa impormasyon nga may armado nga grupo nga nagapamakal sang boto sa Barotac Nuevo.
Una na man nga ginnpabutyag ni Pinuela nga lunsay harassment lang ang mga kaso nga ginpasaka batok sa iya kag gintudlo sini si Biron nga amo ang utok sang tanan.
Nahibaluan nga ini na ang ikaduha nga beses nga gin-suspend si Pinuela matapos nga gindagdagan man ini sang tatlo ka bulan nga suspension order sang Nobyembre 1, 2016 tubtob Enero 31, 2017 angot naman sa pagluthang-patay nanday Lieutenant Rey Castro kag PSSgt Aaron Gaton sa poultry dealer nga si Arlie Decolongon sang Enero 2, 2014 sa Dumangas public market.
Sang amo nga tion,si Pinuela ang hepe sang Dumangas PNP kag ginpanindugan nga self-defense lang ang natabo bangud sa pagbato ni Decolongon sa duha ka mga pulis.
