ILOILO CITY- Mangin available na liwat sa merkado ang mga isda nga gindumilian nga dakpon, ibaligya kag konsumuhon bangud sa ginpatuman nga closed season sa Visayan Sea.
Kadungan ini sang pagtakop na kahapon,Pebrero 15, sang closed season nga nag-umpisa sang Nobyembre 15,2021.
Sa interview sang Bombo Radyo kay Engr. Remia Aparri,director sang Bureau of Fisheries and Aquatic Resource Region -6, iya ginpahayag nga mahimo na liwat nga makapangdakop ang mga manugpangisda sang masunod: tuloy, tamban, tabagak, balantiyong, guma-a, bulao kag hasa-hasa.
Suno kay Aparri, bangud sa pagsugod na sang open season, mas madamo nga isda ang mahimo nga mabakal kag makonsumo sang mga pumuluyo.
Pahayag niya, makahatag man ini sang dugang nga palangabuhian sa mga manugpangisda.
Nahibaluan nga ang closed season nagadungan sa tion para sa mga isda nga mag-reproduce kag magdako.
