ILOILO CITY- Arestado bangud sa kaso nga 6 counts sang estafa ang mayoral candidate sa banwa sang Miag-ao, Iloilo.
Ini amo si Anthony Ticorda, 52 anyos,residente sang Barangay Baybay Norte, Miag-ao.
Gindakop ini sang gintingob nga pwersa sang Sara kag Miag-ao police stations pinaagi sa isa ka arrest warrant.
Suno kay Police Major Jose Nemias Pamplona, hepe sang Sara PNP, gin-file sa banwa sang Sara ang anom ka counts sang estafa.
Ginapahayag nga may kaangtanan sa duta ang kaso batok kay Ticorda.
Gina-proseso na sini subong ang pyansa nga P18,000 sa kada kaso.
Si Ticorda ang nagapadalagan batok kay anay 1st District Congressman Richard Garin sa pagka-alkalde sang Miagao.
