ILOILO CITY- Epektibo na subong nga adlaw, Pebrero 16 ang suspension order nga gindagdag sang Office of the Ombdusman kay PLt. Col Jonathan Pinuela.
Ini may kaangtanan sa kaso nga conduct prejudicial to the best interest of the service, grave abuse of authority kag grave misconduct nga ginpasaka batok sa iya ni Jeffrey Mar Agub angot sa ginaalegar pagtaya ni Pinuela sang armas kay Agub nga tinawo ni former Congressman Ferj Biron sang 2019.
Ang 182 ka adlaw nga suspension order ang matapos sa Agusto 15.
Sa interview sang Bombo Radyo kay PCol Adrian Acollador, director sang Iloilo Police Provincial Office,iya ginpahayag nga bangud sang suspension ni Pinuela, mabakante ang ang iya posisyon bilang pinuno sang Provincial Investigation Management Unit sang IPPO.
Suno kay Acollador, si PMajor Raymund Celoso nga hepe subong sang Maasin PNP ang i-assign nga bag-o nga magapungko nga pinuno sang unit apang ini ang kinahanglan pa nga aprubahan sang Commission on Elections.
Ini agud nga matutukan man sa gihapon ang Claire Diergos Murder case sa diin si Pinuela ang nagaserbe nga spokesperson sang Special Investigation Team.
Sa tion naman nga maaprubahan ang request, si Celoso ang buslan ni PMajor Bonifacio Alabe bilang bag-o nga hepe sang Maasin police station.
Sa subong, ang OIC sang Provincial Investigation Management Unit amo ang deputy sini nga si PLt Johnny Arnad.
