ILOILO CITY- Gindula na sang Iloilo Province ang swab test requirement para sa mga fully vaccinated travelers halin sa guwa sang Western Visayas nga magasulod sa probinsya sang Iloilo epektibo subong nga adlaw Pebrero 16, 2022.
Santo sa Executive Order No 040-B Series of 2022 nga gin-issue ni Iloilo Gov. Arthur Defensor Jr., ang mga residents kag non-residents nga nakakumpleto na sa pagpabakuna ang indi na kinahanglan pa nga magpresentar sang negative RT-PCR test result 72 hrs antes ang byahe padulong sa Iloilo.
Sa interview sang Bombo Radyo kay Defensor, iya ginpahayag nga ang kinahanglan lang gid nga ipakita sang mga fully vaccinated travelers amo ang ila nga COVID-19 vaccination certificate.
Suno kay Defensor, ang mga unvaccinated kag partially vaccinated ang kinahanglan man sa gihapon nga magpaidalom sa swab test.
Ang mga kabataan naga edad 5 ka tuig panubo ang exempted sa pagpaidalom sa swab tests.
Nahibaluan nga nagapabilin sa Alert Level 3 ang probinsya tubtob sa katapusan sang bulan sang Pebrero.
