Mabudlayan ang Iloilo City Police Office (ICPO) nga matapos ang imbestigasyon kaangot sa shooting incident sa Barangay Calaparan, Arevalo, Iloilo City kun indi magkooperar ang pamilya sang biktima.
Una diri, nagpahayag ang pamilya sang biktima nga si Valerie Abantao nga indi na sila magpasaka sang kaso batok sa suspek ukon mga suspek.
Sa interview sang Bombo Radyo kay ICPO Director Pol. Col. Leo Batiles, iya ginpahayag nga ginmanduan niya ang pulis sa Arevalo Police Station nga padayunon lang ang pag-imbestigar agud madakpan ang riding-in-tandem suspects.
Kun madakpan ang mga suspek kag wala-gana ang pamilya sang biktima suno sa ICPO director, posible nga indi man ang mga ini masilutan.
Wala naman sang autopsy nga patigayunon bangud nagpamalibad man ang pamilya ni Abantao.
Una nga ginpahayag sang pulis nga posible iligal nga droga ukon utang ang rason sa likod sang pagpatay sa 41 anyos nga biktima, apang sa subong, gina-angot ang krimen sa third party.
