Ginahandaan na sang Department of Enery (DOE) ang mga alternatibo nga himuon sa Pilipinas sa tunga sang nagakatabo nga disruptions sa suplay sang gatong sa international market.
Nagtukod ang ahensya sang task force nga amo ang magahimo sang contingency plan agud nga ma-address ang ginapanan-aw nga internal kag/ukon external supply disruptions.
Suno kay DOE-Oil Industry Management Bureau assistant director Rodela Romero, nagapakig-angot na ang DOE sa Philippine National Oil Co. (PNOC) kag iban pa nga government agencies agud nga matumod kun ano ang lebel sang demand sa pungsod kag ang requirements sang lain-lain nga sector kaangay sang transport sector kag iban pa nga industriya.
Nagakabatyagan na subong ang disruption sang oil supply sa international market kag nagasaka man ang global oil price.
Lakip sa ginatumod rason amo ang gamo sa tunga sang Russia kag Ukraine, explosion sa Nigeria, maintenance disruption kag pipeline leaks sa Libya kag amo man ang oil spills sa Ecuador kag Kazakhstan.
Sa local market, pito na ka semana nga nagsaka ang presyo sang gatong. ##
