Sa labing-una nga tion halin sang ginkoronahan bilang Miss Universe Philippines kag pagtapos sa Top 5 sa 70th Miss Universe, nagpa-guwa na sang statement si reigning Miss Universe Philippines Beatrice Luigi Gomez may kaangtanan sa ila breakup sang iya long-time partner nga si DJ Kate Jagdon.
Tatlo ka bulan naman ang nagligad halin sang nagbulagay ang duha.
Sa serye sang Instagram stories, ginpahayag ni Bea nga mauntat na siya sa paghipos bangud kapoy na siya sa padayon nga harassment nga nabaton niya kag sang iya mga pinalangga sa kabuhi.
Suno pa kay Bea, para man ini sa iya nga peace of mind.
Ginpahayag sang beauty queen nga apisar sang judgment sang iban nga tawo, wala gid sang nabatian halin sa iya sang una bangud nagtutok siya para sa Miss Universe crown.
Gin-ako sini nga nakaapekto na sa iya nga mental health ang hate messages nga nabaton halin sang nasapubliko ang ila breakup sang iya nga girlfriend.
Ginpaathag ni Bea nga natabo ang breakup matapos sini nadiskubrehan nga indi na loyal si Kate sa iya.
Antes pa man ang MUPH pageant, ginapahayag nga masobra isa ka tuig na nga may gina-entertain si Kate nga persona nga gintawag kay Adam, kag ginapahayag naga-make out man si Kate sa ‘someone else’, naga-himo sang move sa iban nga babayi, kag nagakadugayan sa paglagaw kag indi na makapauli sang pila ka adlaw.
Naglab-ot sa punto suno kay Bea nga indi na niya makilala si Kate kag naglain na ang dalagan sang mga bagay. Apisar gin-ako ni Bea nga may mga sala man siya sa ila nga relationship, ginpahayag sini nga nangin VICTIM si Kate sa ila nga pagbulagay bangud amo sini ang iya nga ginpili.
Sa katapusan nga bahin sang iya nga mensahe, ginpasalamatan ni Bea ang iya constants, kag ginpahayag nga pareho sila ni Kate nga deserving nga mangin happy.
Ang statement sang beauty queen ang ginpaguwa isa ka adlaw matapos nga gin-post sini ang picture kun sa diin kaupod niya ang lalaki nga iya nga Valentine’s date. ##
