Ginpaagi nalang sang pila ka mga kliyente sang Department of Foreign Affairs (DFA) sa online agent ang pagkuha sang slot agud makaproseso sa pagpa-renew sang passport.
Sa interview sang Bombo Radyo kay alyas Jun, residente sang Iloilo Province, iya ginpahayag nga Nobyembre sang nagligad nga tuig sang nag-umpisa siya sa pag-monitor sa website sang DFA agud makakuha sang slot.
Apang nag-abot lang ang bulan sang Disyembre, wala pa sa gihapon sang available nga slot agud makaproseso siya sa pagpa-renew sang passport.
Suno kay Jun, Disyembre 13 sang nagpangayo na siya sang bulig sa isa ka online agent ukon fixer nga nagtanyag sang madasig nga pagkuha sang slot.
P500 naman ang sukot sang fixer para sa processing fee.
Pahayag ni Jun, bisan Enero 27 na naka-secure sang slot ang online agent sa area sang Iloilo Province, nangin tayuyon man ang iya pag-proseso sa pagkuha sang passport.
Apang suno sa iya, makatilingala kun paano maka-secure sang slot ang ini mga online agent bisan indi man sila konektado sa DFA.
Dugang pa niya, kun indi pa masolusyunan sang nasambit nga ahensya ang tuman ka dugay nga proseso sang application, renewal kag release sang passports, pat-od nga mangin makaluluoy ang iban pa nga Overseas Filipino Workers (OFW) nga may yara lang sang isa ka bulan nga vacation leave.
Pahayag sang natungdan, bisan mapabulig pa ang mga OFW sa online agents, nagalab-ot sa gihapon sa ginabanta apat ka bulan ang proseso agud makakuha ukon makapa-renew sang passport bangud sa tuman kahinay nga sistema sang DFA.
