Gin-propose ni Finance Secretary Carlos Dominguez III ang bag-o kag mas mataas nga buwis agud nga mabayaran ang utang sang Duterte administration sa luwas sang pungsod.
Ang amo nga foreign debts amo ang ginpahayag gingamit sa pagbakal sang bakuna kag pag-address sa COVID-19 pandemic sa Pilipinas.
Suno kay Dominguez, mangin paagi ang mass vaccination sang gobyerno agud nga makabukas liwat ang ekonomiya sang pungsod kag malab-ot sang more productive economic sectors ang 7 percent tubtub sa 9 percent nga gross domestic product (GDP) growth subong nga tuig.
Apang may masulusobra na lang 100 ka adlaw nga nabilin sa Duterte administration kag ang masunod nga administrasyon amo ang magasolbar sang utang sang gobyerno.
Sa kabug-usan, $2 billion (masobra P102 billion) ang utang sang gobyerno —$1.2 billion para sa vaccines kag $800 million para sa booster kag pediatric shots— halin sa tatlo ka multilateral banks sang nagligad nga tuig.
Nakahulam man ang Pilipinas sa bilateral partners kaangay sang Japan kag South Korea agud nga may pondo para sa rollout, lakip na ang logistics kag equipment kaangay sang cold storage.
Sa katapusan sang 2021, ang public debt-to-GDP ratio sang Pilipinas ang nagsaka sa16-year high nga 60.5 percent, nga naglapaw sa 60-percent threshold nga amo ang ginalantaw nga masarangan sang emerging markets.
Apang ang finance secretary ang pahambalon, masarangan pa sang Pilipinas ang amo nga ratio.
Ginpahayag ni Dominguez nga diskusyunan pa ang fiscal consolidation package kaupod ang presidential candidates agud mahibaluan nila kun paano madumala ang nagataas nga utang sang Pilipinas. Suno sa iban nga mga opisyal sang Department of Finance (DOF), pwede nga ma-target sang next administration sa “relatively untaxed” sectors. ##
