ILOILO CITY- Ginbalikan ni anay Iloilo Governor Arthur Defensor Jr. ang pagrekober sang masobra sa P500 million dollars nga ill-gotten wealth sang pamilya Marcos kadungan sang pagkomemorar sang 36th Anniversary sang Edsa People Power Revolution.
Sa interview sang Bombo Radyo kay Defensor nga anay commissioner sang Presidential Commission on Good Government (PCGG), iya ginpahayag nga madamo pa sang dapat bawion sa mga Marcos ilabi na ang manggad nga ginpatago niya paagi sa iya mga dummies.
Nahibaluan nga base sa World Bank-UN Office on Drugs and Crime’s Stolen Asset Recovery Initiative,ginsiling nga ginkawat sang anay diktador ang ill-gotten wealth gikan sa gobyerno umpisa sang iya una nga tuig bilang Presidente sang 1965.
Ang amo nga pagtuon nagbuyagyag nga ginkawat ni Marcos ang ginabanta $5 billion tubtob $10 billion sa sulod sang 21-anyos niya nga rehimen.
Suno kay Defensor, ang mga deposito sang Marcos sa bangko ang tama ka komplikado bangud may mga kwarta sila nga naghalin sa Japan (Bank of Tokyo), ginsaylo sa California Overseas Bank, nagsaylo sa isa ka bangko sa Netherland, kag ginbutang nila ang deposito sa dummy corporation nga Aguamina Corporation pakadto sa isa ka bangko sa Switzerland kun sa diin nakuha ni Defensor kag sang PCGG ang tanan nga mga dokumento.
Nahibaluan nga naka-rekober na sang gobyerno ang P172.4 billion kag ginatinguhaan nga marekober pa ang ginabanta dugang nga P125 billion nga ill-gotten wealth sang mga Marcos.
Nahibaluan nga matapos ang Edsa People Power Revolution sang 1986 nga nagbutang sa pwesto kay anay Presidente Corazon Aquino, gintukod ang PCGG paagi sa isa ka executive order agud ma-recover ang tanan nga ill-gotten wealth sang mga Marcos, mga paryente, subordinates kag mga kaalyado sini sa sulod man ukon sa gwa sang Pilipinas.
