Malapit na lang nga ipa-guwa sang gobyerno ang P2.5-billion nga fuel subsidies para sa mga driver agud nga mabuligan ang mga ini sa tunga sang problema sang pagsaka sa presyo sang gatong nga ilabi pa nga ginpalala bangud sang away sa Ukraine.
Ang Pilipinas ang makabig nga isa ka net oil importer ukon pungsod nga mas madamo pa ang ginabakal nga gatong halin sa iban nga pungsod ipaanggid sa sarang sini nga ma-export.
Suno pa sa statement sang cabinet-level Development Budget Coordination Committee (DBCC), ang P2.5 billion ang nagikan sa fuel subsidy program sang Department of Transportation (DOTr).
Igapanagtag ini sa 377,000 “qualified PUV drivers” nga naga-operate sang jeep, UV Express vans, taxis, tricycles kag iban pa nga “full-time ride-hailing and delivery services nationwide.”
Magluwas diri, ang Department of Agriculture ang magahatag man sang P500-million budget para sa affected farmers kag fisherfolk.
Sang nagligad nga semana, nagpahayag si Finance Secretary Carlos Dominguez III nga kun magdangat sa $100 ukon masobra P5,000 kada bariles ang presyo sang gatong sa global market, “concerning” na ini para sa Pilipinas apang “ready” man ang pungsod.
Antes ang pag-atake sang Russia sa Ukraine, walo na nga daan ka asud-asud nga semana nga nagsaka ang presyo sang gatong sa Pilipinas. ##
