ILOILO CITY- Nagpaandam ang Iloilo City Police Office ICPO) nga indi dapat mangin tuman ka excited ang mga pumuluyo sang Iloilo City sa pagpahalog sang restrictions kadungan sang pag-umpisa na sang pagpaidalom sa syudad sa alert level 2 gikan sa level 3.
Sa interview sang Bombo Radyo kay PCol Leo Batiles, iya ginpahayag nga nga kinahanglan maghagan-hagan sa gihapon ang mga pumuluyo sa paghiwat sang aktibidad nga mahimo magbutang sa ila sa risgo sang pag-angkon sang COVID-19 infection.
Suno kay Batiles, dapat man kontrolon ang pag-inom sang makahulubog nga ilimnon nga masami ginatunaan sang kinagamo kag disgrasya.
Nahibaluan nga base sa IATF Resolution No. 163-A, ipaidalom na sa Alert level 2 ang Iloilo City, Iloilo Province, Negros Occidental, kag Antique.
Alert Level 1 naman ang Aklan, Capiz, Bacolod City, kag Guimaras.
Ang bag-o nga alert level ang epektibo umpisa sa Marso 1 tubtob 15,2022.
