Ginpadayaw sang Philippine Olympic Committee (POC) ang makabig “fighting team” sang Pilipinas nga amu ang ipadala saVietnam para sa Southeast Asian (SEA) games sa Mayo.
Gin-ako naman sang POC nga mas naggamay ang numero sang mga atleta nga ipadala sang Pilipinas subong nga tuig kun ipaanggid sang 2019.
May kabug-usan nga 656 ka mga atleta ang ipadala sa Vietnam mas manubo sa 1,115 sang 2019.
Suno kay POC president Abraham “Bambol” Tolentino, nagasalig ini nga madepensahan sang Pilipinas ang titulo nga ila nakuha sang 2019.
Ang Pilipinas ang maga-compete sa 39 out of 40 sports. Sa 39 nga ini, magapartisipar ang pungsod sa 44 ka mga disciplines.
Ginahulat pa sang POC ang tentative list sang mga atleta nga maga-compete sa men’s 3×3 kag 5×5 basketball, weight lifting, kag jiu jitsu.
Ginalantaw nga pagabug-usan sang 874 ang delegation sang Pilipinas sa diin 177 diri ang team officials (coaches, team managers ukon NSA representatives), kag 20 ang myembro sang medical team (doctors, nurses kag masseurs/therapists) kag administrative staff.
