Nagpaandam ang National Economic and Development Authority (NEDA) nga makatuga sang dugang nga problema sa pagsaka sang presyo sang mga balaklon ang kakulangan sang suplay sang kalamay sa pungsod.
Suno kay NEDA Undersecretary Rosemarie Edillon, ang kakulang sa suplay sang local sugar amo ang nagtulod sa gobyerno nga mag-import sang 200,000 metric tons sang kalamay.
Apang wala ini napadayon matapos nag-isyu ang regional trial court sa Negros Occidental sang writ of prelimiary injunction sa Sugar Regulatory Administration (SRA).
Buot silingon, ginmanduan ang SRA nga untaton anay ang importation tubtub nga ma-lift sang korte ang injunction.
Kun wala ini sang solusyon suno sa NEDA, may epekto ini sa inflation.
Antes sini, nagasuprer na nga daan ang Pilipinas sa mataas nga presyo sang gatong nga naglala bangud sa away sang Ukraine kag Russia.
Sang nagligad lang nga semana, may mga food manufacturers nga nagsuporta sa gobyerno kag nagpahayag nga tuman na ka kinahanglanon nga mag-import sang kalamay kag may mga reports man nga ang inventory sang refined sugar ang magakulang na sa bulan sang Marso.
