Apisar sang kontrobersiya sa tunga ni Filipino Olympian pole vaulter Ernest John “EJ” Obiena kag sa iya mother national sports association nga Philippine Athletics Track and Field Association (Patafa), wala ini nangin upang agud magtaas pa ang iya nga tumbo kag makahatag dungog sa pungsod.
Sa Perche Elite Tour sa France, nag-set si Obiena sang bag-o nga national record ukon ang iya season-best nga 5.91 meters.
Silver medalist si EJ sa amo nga kumpetisyon. Mas mataas ini sa iya anay nga season-best nga 5.81 meters nga nakuha niya sang nagdaog siya sang gold medal sa Orlen Cup kag Orlen Copernicus Cup sa Poland sang February.
Apang mas manubo naman ini sang duha lang ka sentimetro sa iya nga Asian record nga 5.93 meters nga gin-set niya sang nag-compete siya sa Golden Roof Challenge sa Austria sang Septyembre sang nagligad nga tuig.
Isa man sa nangin talalupangdon kay EJ sa iya kumpetisyon sa France amo ang pagsuksok sini sang baller band nga may duag nga yellow kag blue nga nagasimbolo sang flag sang Ukraine.
Antes ang paglukso, ginbayaw ni EJ ang iya nga kamot kag ginpakita ang ballers, kag pagkatapos sang iya nga lukso, gintudlo sini ang ballers kag ginhalukan. Nahibaluan nga isa ka Ukrainian citizen ang coach ni EJ nga si Vitaly Petrov. ##
