Indi na madepensahan ni Olympian pole-vaulter EJ Obiena ang iya titulo sa patigayunon nga Southeast Asian (SEA) Games sa Vietnam sa Mayo.
Ini ang kasunod sang desisyon sang Philippine Athletics Track and Field Association (PATAFA) nga indi pag-ilakip sa mga magapasakop nga atleta si Obiena.
Nahibaluan nga si Obiena ang reigning gold medalist sa SEA Games sang 2019.
Ang amo nga desisyon ang ginkasubo ni Philippine Olympic Committee (POC) President Abraham “Bambol” Tolentino bangud nakita sini ang development ni Obiena nga subong nagapang-lima sa kalibutan sa patag sang pole-vaulter.
Nagasalig kuntani si Tolentino nga sa liwat makakuha sang medalya para sa Pilipinas si Obiena.
Bilang wala nalakip sa listahan sang mga atleta nga magapadulong sa SEA Games, indi man mangin kabahin sang World Indoor Championships si Obiena nga patigayunon sa Marso 18-20 sa Belgrade, Serbia.
