ILOILO CITY- Nagpasalig ang Global Business Power (GBP) Corporation nga wala sang mangin dako nga epekto sa ila operasyon ang pagtaas sang presyo sang gatong bilang resulta sang Russia- Ukraine conflict.
Sa interview sang Bombo Radyo kay Engineer Nilo Madrid, First Vice President sang Panay Energy Development Corporation (PEDC), subsidiary sang GBP, iya ginpahayag nga una bes, wala man nagakuha sang coal ang Pilipinas sa Russia.
Suno kay Engr. Madrid, tayuyon sa gihapon ang pagkuha sang coal supply sang Pilipinas gikan sa Indonesia kun sa diin 85% sang coal requirement sang PEDC ang nagahalin sa Indonesia kag ang 15% ang nagahalin sa domestic coal.
Pahayag ni Madrid, wala man nagagamit sang fuel oil ang ila planta magluwas lang sa tion sang start- up sini.
Apang gin-ako niya nga bangud sa nagakatabo nga krisis subong, may posibilidad gid man nga magtaas ang presyo sang coal nga gina-import sang Pilipinas.
Sa iya personal nga pagbanta, sa worst- case scenario, kun magtimbuok sa 400 dollars per metric ton ang presyo sang coal, mahimo nga mangin katumbas ini sang 6-9 pesos nga dugang nga bayad per kilowatt hour sa mga electric distribution utilities kag mahimo nga ipapas-an man ini sa mga konsumidor.
Nahibaluan nga tatlo ka coal plants ang gina-operate sang PEDC nga nahamtang sa Brgy. Ingore, La Paz, Iloilo City nga naga-generate sang kuryente nga amo ang ginabakal sang mga electric cooperatives kag distribution utilities sa Iloilo.
