Ginpahanumdom sang mga pulis sa publiko nga ginabululigan dapat ang responsibilidad agud nga malikawan ang pagpang-abuso ilabi na sa mga kabataan.
Sa Western Visayas, sa bulan sang Enero kag Pebrero subong nga tuig, may yara na sang 54 ka kaso sang pagpanghimulos nga na-rekord ang Police Regional Office (PRO) VI.
Sa 54, tatlo diri ang nagikan sa Aklan, lima sa Antique, pito sa Bacolod City, duha sa Capiz, duha sa Guimaras, 23 sa probinsya sang Iloilo, duha sa syudad sang Iloilo, kag 10 halin sa Negros Occidental.
Sa interview sang Bombo Radyo kay Pol. Lt. Col. Arnel Solis, spokesperson sang PRO VI, iya ginpahayag nga ginapabaskog pa gid sang otoridad ang kampanya batok sa rape paagi man sa sa enhanced managing police operations.
Gina-edukar man ang mga ginikanan ukon ang mga bantay sang mga bata kun ano ang ila posible himuon sa tion nga bayaan ang ila nga mga kabataan nga wala sang kaupod.
Sa una nga statement nga ginpaguwa sang hanay sang Philippine National Police (PNP), ginpahayag nga ang bag-o nga layi nga nagpasaka sang edad sang sexual consent halin sa 12 anyos pasaka sa 16 anyos ang makabig nga isa ka major development sa kampanya batok sa abuse of minors nga amo nga ginakabig vulnerable nga sektor sa sosyudad.
Una naman nga nagpasalig ang PNP nga pabaskugon pa ang information campaign agud nga mas madamo ang makahibalo may kaangtanan sa proteksyon para sa mga menor de edad.
